Plantun de Prouvènço

Pèr coumpara dos planto d'encò nostre

Phyteuma hemisphaericum & Plumbago europaea

Phyteuma hemisphaericum

Campanulaceae

Nom en français : Raiponce hémisphérique.

Descripcioun :
Aquéu rapounchoun tèune d'auto mountagno trachis dins li pelouso e roucas. Èi gaire coumun au nostre e se pòu counfoundre emé d'àutri meno coume lou rapounchoun-redoun. Se li fueio basalo espatulado an souvènt despareigu à la flourido, lis autro soun primo e tóuti en long (fotò). Li bratèio soun en triangle.

Usanço :
Sèmblo que li rapounchoun soun tóuti manjadis, majamen li jóuini brout emai li racino poupouso cuecho.

Port : Erbo
Taio : 3 à 20 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Phyteuma
Famiho : Campanulaceae

Ordre : Asterales

Coulour de la flour : Bluio
Petalo : 5
Ø (o loungour) enflourejado : 1,5 cm
Flourido : Printèms - Estiéu

Sòu : Si
Autour basso e auto : 1600 à 3200 m
Aparado : Noun
Jun à avoust

Liò : Pelouso - Roucas - Champino
Estànci : Subaupen à Aupen
Couroulougi : Ouroufito-Sud-Ouèst-Éuroupenco
Ref. sc. : Phyteuma hemisphaericum L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.